26 мая ў Крывічах у чарговы раз прайшло свята малака, якое палюбілася крывічанам і гасцям аграгарадка, таму што прапагандуе сямейныя каштоўнасці, здаровы і актыўны лад жыцця.
Арганізатары «Малочнай краіны» -2019 падрыхтавалі насычаную культурна-забаўляльную праграму: тэатралізаванае шэсце «Усіх на свята запрашаем» па цэнтральнай вуліцы аграгарадка, выстава работ і майстар-класы народных умельцаў «Фарбы творчасці», гульнёвы дворык «Любяць гульні ўсе на свеце — і дарослыя, і дзеці», фотазона «Фота на памяць», літаратурны вернісаж «Кожная гаспадыня ведае, чаму яе «Зорька» перавагу аддае».
Святочны настрой стваралі:
— конкурс «Лепшы дояр — 2019»;
— жартоўныя конкурсы «Малочны батл», «Аб малацэ я ведаю ўсё»;
— цырымонія ўшанавання «Лепшы малаказдатчык — 2018»;
— канцэрт калектываў аматарскай творчасці Бераставіцкага і Зэльвенскага раёнаў «Ад шчырага сэрца для добрага настрою».
Асаблівай папулярнасцю ў наведвальнікаў карысталася выстава-дэгустацыя малочных прадуктаў «Малочныя смачнасці»: хатнія малако, вяршкі, сыры, ёгурты, разнастайнае печыва.
Песні, гульні, скокі, жарты…
Да позняга вечара лунаў над Крывічамі водар свята…
